ہیٹ برسٹ(Heat Burst) ایک غیر معمولی موسمی کیفیت ہے جو عام طور پر گرج چمک والے طوفانی بادلوں کے ختم ہونے کے بعد پیدا ہو سکتی ہے۔ جب یہ بادل تحلیل ہوتے ہیں تو ان کے اندر موجود ٹھنڈی ہوا تیزی سے نیچے کی طرف حرکت کرتی ہے، جسے ڈاؤن ڈرافٹ کہا جاتا ہے۔
اگر زمین کے قریب فضا خشک ہو تو بارش کے قطرے زمین تک پہنچنے سے پہلے ہی بخارات بن جاتے ہیں۔ اس عمل سے ہوا مزید خشک ہو جاتی ہے اور نیچے کی طرف آنے والی ہوا دباؤ کے باعث تیزی سے گرم ہو جاتی ہے، جسے کمپریشن ہیٹنگ کہا جاتا ہے۔
یہ گرم ہوا جب سطحِ زمین سے ٹکراتی ہے تو پھیل جاتی ہے، جس کے نتیجے میں درجہ حرارت میں اچانک اضافہ ہو سکتا ہے، ہوا غیر معمولی طور پر خشک ہو جاتی ہے اور بعض اوقات تیز گرم جھونکے بھی چلتے ہیں۔
ہیٹ برسٹ کی خاص بات اس کا اچانک اور مختصر دورانیہ ہے، جو چند منٹ سے چند گھنٹوں تک ہو سکتا ہے۔ یہ کیفیت اکثر رات کے وقت بھی محسوس کی جا سکتی ہے، جب عام طور پر درجہ حرارت کم ہوتا ہے۔
بیرون ملک ملازمت کے خواہشمند پاکستانی ہوشیار ہوجائیں!
اس کی علامات میں اچانک گرمی میں اضافہ، ہوا کی خشکی، نمی میں واضح کمی اور گرم جھکڑ شامل ہیں۔ یہ صورتحال عام ہیٹ ویو سے مختلف ہوتی ہے کیونکہ ہیٹ ویو طویل عرصے تک جاری رہتی ہے جبکہ ہیٹ برسٹ عارضی نوعیت کا ہوتا ہے۔
ماہرین کے مطابق پاکستان میں جاری شدید گرمی کی لہر کو ہر صورت ہیٹ برسٹ قرار دینا درست نہیں، کیونکہ یہ ایک خاص اور نسبتاً نایاب موسمی مظہر ہے جو مخصوص حالات میں ہی پیدا ہوتا ہے۔
