اجے ماکن نے کہا کہ دہلی میٹرو کا تصور 1994 میں کانگریس دور میں سامنے آیا۔ ان کے مطابق اس وقت کے وزیر اعظم نرسمہا راؤ نے اصولی منظوری دی، جبکہ 1995 میں دہلی میٹرو ریل کارپوریشن وجود میں آئی۔ انہوں نے کہا کہ 2002 میں شیلا دکشت نے دہلی میٹرو کی پہلی لائن کا افتتاح کیا، جبکہ 2005 میں منموہن سنگھ حکومت نے دوسرے مرحلے اور 2011 میں تیسرے مرحلے کی منظوری دی۔
انہوں نے دعویٰ کیا کہ دہلی میٹرو کے 416 منظور شدہ کلو میٹر میں سے 351 کلو میٹر لائنوں کی منظوری کانگریس دور میں دی گئی، جو مجموعی منصوبے کا 84 فیصد بنتا ہے۔ ان کے مطابق بی جے پی کی مرکزی حکومت کے دور میں صرف چوتھے مرحلے کے 65 کلو میٹر حصے کی منظوری دی گئی۔
