قومی ایئرلائن کا پی آئی اے حج آپریشن 2026 کامیابی کے ساتھ مکمل ہو گیا ہے، جس کے دوران ہزاروں پاکستانی عازمین کو بروقت سعودی عرب پہنچایا گیا۔ ترجمان پی آئی اے کے مطابق اس سال قبل از حج آپریشن میں بروقت پروازوں کی شرح 97 فیصد رہی۔
پی آئی اے نے 210 خصوصی اور شیڈول پروازوں کے ذریعے 53 ہزار سے زائد عازمین حج کو حجاز مقدس پہنچایا۔ ترجمان کا کہنا ہے کہ قومی ایئرلائن نے مقررہ ہدف سے بھی بہتر کارکردگی دکھائی اور بروقت روانگی کی شرح مقررہ ہدف سے سات فیصد زیادہ رہی۔
حج آپریشن کے دوران اسلام آباد، کراچی، لاہور، فیصل آباد، ملتان، سیالکوٹ اور کوئٹہ سے براہِ راست پروازیں چلائی گئیں۔ ان پروازوں کے ذریعے ملک بھر سے عازمین کو سعودی عرب منتقل کیا گیا۔
پی آئی اے انتظامیہ کے مطابق بعد از حج آپریشن کے لیے بھی تمام انتظامات مکمل کر لیے گئے ہیں۔ بعد از حج فلائٹ آپریشن 30 مئی 2026 سے شروع ہوگا جبکہ آخری پرواز 30 جون 2026 کو پاکستان پہنچے گی۔
ترجمان ظفر ہاشمی نے کہا کہ قومی ایئرلائن نے عازمین حج کو بہتر سفری سہولیات فراہم کرنے کے لیے خصوصی اقدامات کیے، جس کے باعث حج آپریشن کامیابی سے مکمل ہوا۔
پی آئی اے حج آپریشن کی بروقت تکمیل پر مختلف حلقوں کی جانب سے قومی ایئرلائن کی کارکردگی کو سراہا جا رہا ہے۔
