شاپنگ سینٹر میں خوفناک آگ بھڑک اُٹھی،کئی اموات – Pakistan News International – Latest Pakistani News in Urdu

ایران کے دارالحکومت تہران میں ایک شاپنگ سینٹر میں اچانک آگ بھڑک اٹھی جس کے نتیجے میں کم از کم 8 افراد جان کی بازی ہار گئے جبکہ 36 افراد زخمی ہو گئے۔

مقامی میڈیا کے مطابق یہ واقعہ تہران کے مغرب میں واقع شہر اندیشہ کے ارغوان شاپنگ سینٹر میں پیش آیا، جہاں اچانک آگ بھڑک اٹھی۔

ایرانی عدلیہ کے اخبار میزان کے مطابق آگ لگنے کی ایک بڑی وجہ عمارت میں استعمال ہونے والا آتش گیر بیرونی مواد (کلیڈنگ) تھا۔

ایرانی میڈیا اور خبر رساں ادارے ارنا کی جانب سے جاری ویڈیوز میں دیکھا جا سکتا ہے کہ عمارت مکمل طور پر شعلوں کی لپیٹ میں آ گئی تھی۔

دوسری جانب سرکاری ریڈیو براڈکاسٹر اریب نے بتایا ہے کہ واقعے کے ذمہ داران اور پراپرٹی ڈویلپر کی شناخت اور گرفتاری کے احکامات جاری کر دیے گئے ہیں۔

سرکاری نشریاتی ادارے کے مطابق یہ افسوسناک واقعہ تہران کے مغربی علاقے میں واقع ایک شاپنگ سینٹر میں پیش آیا، جہاں اچانک آگ لگ گئی۔ ابتدائی اطلاعات کے مطابق آگ عمارت میں تیزی سے پھیلی جس کی بڑی وجہ عمارت پر موجود آتش گیر پینٹ کو قرار دیا جا رہا ہے۔

ریسکیو ٹیمیں اور فائر بریگیڈ کا عملہ فوری طور پر موقع پر پہنچ گیا اور آگ پر قابو پانے کے لیے کارروائیاں شروع کر دیں۔ امدادی اہلکاروں نے زخمیوں کو قریبی اسپتالوں میں منتقل کیا جہاں بعض کی حالت تشویشناک بتائی جا رہی ہے۔

حکام کا کہنا ہے کہ واقعے کی تحقیقات شروع کر دی گئی ہیں تاکہ آگ لگنے کی اصل وجہ معلوم کی جا سکے۔ مزید جانی نقصان کے خدشے کے پیش نظر ریسکیو آپریشن جاری ہے جبکہ عمارت کو خالی کرا لیا گیا ہے۔