اسلام آباد ہائی کورٹ اور ماتحت عدالتوں میں عیدالاضحیٰ کے موقع پر اسلام آباد عدالتوں کی تعطیلات کا باضابطہ اعلان کر دیا گیا ہے۔ رجسٹرار اسلام آباد ہائی کورٹ نے چیف جسٹس کی منظوری کے بعد اس حوالے سے نوٹیفکیشن جاری کر دیا۔
جاری نوٹیفکیشن کے مطابق اسلام آباد عدالتوں کی تعطیلات 26 مئی سے 28 مئی 2026 تک ہوں گی، جس کے دوران تمام عدالتی امور بند رہیں گے۔ تعطیلات کے باعث منگل سے جمعرات تک اسلام آباد ہائی کورٹ اور ماتحت عدالتوں میں کوئی جوڈیشل ورک نہیں ہوگا۔
ذرائع کے مطابق عید کی سرکاری چھٹیوں کے بعد کفایت شعاری مہم کے تحت جمعہ سے اتوار تک بھی عدالتی کارروائیاں معطل رہیں گی، جس کے باعث عدالتوں میں مسلسل کئی روز تک کام نہیں ہو سکے گا۔
عدالتی حلقوں کا کہنا ہے کہ تعطیلات کے دوران صرف ہنگامی نوعیت کے معاملات کیلئے مخصوص ڈیوٹی ججز دستیاب ہو سکتے ہیں، جبکہ معمول کے مقدمات کی سماعت مقررہ شیڈول کے مطابق تعطیلات کے بعد دوبارہ شروع ہوگی۔
واضح رہے کہ وفاقی حکومت پہلے ہی عیدالاضحیٰ کیلئے 26 سے 28 مئی تک تین روزہ سرکاری تعطیلات کا اعلان کر چکی ہے، جس کے بعد مختلف سرکاری ادارے بھی اپنے تعطیلاتی شیڈول جاری کر رہے ہیں۔
